2010.07.07 Çăл тасатрĕç

Кăçал çанталăк типĕ тăнă пирки, ялти пĕвесем те, çăлсем те типсе ларчĕç. Апат-çимĕç пĕçерме те, выльăх-чĕрлĕхе, пахчаçимĕçе шăварма та шыв кирлĕ. Шыв тулăх чухне юхăнса кайнă çырмари çăлсене халĕ тасатса ĕçе кĕртме пуçларĕç.

Качалав ялĕнче пурăнакансем çырмара çăл чаврĕç. Анатарах тахçан усă курнă, халĕ юхăнса кайнă сивĕ çăл пурччĕ. Шывĕ çемçе, сивĕ, таса. Малтанхи вăхăтра вăл çăлтан  чей вĕретме, пăрçа яшки пĕçерме шыв илетчĕç. Юлашки вăхăтра çăл ани йăтăнса анчĕ, усă курма пăрахрĕç. Халĕ çăлсенче шыв пĕтнĕрен, Владимир, Анатолий, Евгений, Руслан Петровсем, Юрий Архипов тата ыттисем те çав çăла юсаса усă курма юрăхлă турĕç: тасатрĕç, анине çĕнĕрен турĕç.