2010.04.30 Аллея çулсерен çĕнелет

Федераци казначействин управленийĕн Элĕк районĕнчи уйрăмĕн ĕçченĕсем ĕçре кăна мар,  художество пултарулăх енĕпе те палăраççĕ. Çавăн пекех обществăлла ĕçсенчен те аякка юлмаççĕ. Элĕкри культурăпа кану паркĕнче казначейсем темиçе çул каялла аллея уçнăччĕ, унта палăк вырнаçтарнăччĕ. Çавăн чухнех темиçе теçетке хурăн хунавĕсене лартнăччĕ. Самаях аталаннă. Унта вĕсем çулсеренех çĕнĕрен те çĕнĕ хунавсемпе аллейăна çĕнетсе тăраççĕ. Иртнĕ кунсенче каллех федераци казначействин управленийĕн Элĕкри уйрăмĕн ĕçченĕсем, Н.Андреев  ертÿçĕ ертсе пынипе, аллейăна тухрĕç, унта тасатса тирпейлессипе тимлерĕç. Çавăн пекех 15 чăрăш тата 40 хурăн лартрĕç. Çамрăк хунавсене картласа тухрĕç. Вĕсене сăрласа илемлетнĕ.